吳秋北再膜拜：毛主席開天闢地

身兼工聯會會長嘅港區人大代表吳秋北又語出驚人！佢噚日緊跟大陸路線，喺網上社交平台出po話12月26日係中共前領導人毛澤東誕辰125周年，認為呢日先係「中國人的聖誕節」，仲話最好嘅紀念方式就係「向主席學習！」不過，佢呢個歌頌po係喺美帝嘅Facebook發佈嘅……可能呢個係中國人的愛國方式啦。唔知係唔係知道有人鬧佢將毛澤東「神化」，佢今日再接再勵出po「補充」，話歷史上傑出人物，有人將佢哋作為民族象徵或神祇，但係「並不是指他多麼的完美無缺，而是強調他推動、結合歷史發展大潮所作出卓越貢獻」。

相關新聞：響應習大大抵制聖誕？北區聖誕烏燈黑火 議員：不涉政治考慮

吳秋北曾經喺反新界東北社運人士獲判上訴得直後，斥法官是「青年殺手，社會罪人」，引來好多「關注」，可能佢真係好鍾意受人關注，今日佢出po時一開始就話「昨天發貼引來關注暴增，今再補充，和各位共勉！」佢就好宏觀咁睇，由秦朝講到現代，話中華歷史上下五千年，從三皇五帝到毛主席，各時代傑出人物都係中華民族驕傲，又引用毛主席講話乜乜乜，總之一味歌頌，「從中華民族偉大復興嘅角度看，毛主席更具開天闢地的首創之功，就更為明顯重要，放在整個中華文明史上都毫不遜色！」

淨係歌頌毛主席？梗係唔會啦，習大大都有份。吳秋北話，新中國係毛主席周總理等人使其站起來，是鄧小平等人使其富起來，是習近平主席等人使其強起來，仲好肯定咁話呢啲必定載入史冊。最尾佢仲教大家正確對待偉大人物嘅方式，「有了偉大的人物，而不知擁護、愛戴、崇仰的國家，是沒有希望的奴隸之邦……怎樣看待毛主席，也在考驗中華兒女、中華民族是否有希望！」

吳秋北落tag都落得好足，落埋自己，同三大「民族英雄」並列，「#毛主席#鄧小平#習近平#民族英雄#中華復興#吳秋北」。咦，講咗咁多歷史，點解漏咗文化大革命害死幾多人、批鬥鬥死幾多人、大饑荒餓死幾多人嘅，唔知聽日佢會唔會再「補充」呢。

唔少網民喺fb留言回應吳秋北，但大多數都係反駁佢嘅偉論，形容毛澤東係毛魔，鬧佢係土匪、殺人魔、淫蟲、垃圾，「佢嘅錯，遠大於佢嘅對。應將其從紀念堂拉出鞭屍」。有人仲反寸：「喜歡歌頌垃圾，就垃圾不如。如果神化毛魔才代表所謂中華兒女的希望，那就代表中國不會再有希望。」有網民溫提吳秋北，喺阿諛奉承、擦鞋舔共前，請先熟讀中國歷史，而且是由1921年共產黨成立時開始讀起，「這樣可大大力掌摑你一巴」

本新聞由蘋果日報提供